प्रेमात पडणे की प्रेम करणे

माझाच संवाद माझ्याशी
=============================

तू पहिल्यांदा दिसलीस, तेंव्हा मन तुझ्या शरीराच्या प्रेमात पडलं
तू बोललीस, तेंव्हा मन तुझ्या बुद्धीच्या प्रेमात पडलं
तू गप्प असायचीस, तेंव्हा मन तुझ्या नि:शब्द सहवासाच्या प्रेमात पडलं
तू जायचीस, तेंव्हा मन तुझ्या आठवणींच्या प्रेमात पडलं
तू आठवायचीस, तेंव्हा मन तुझ्या ओढीच्या प्रेमात पडलं
तू भेटणं लांबवायचीस, तेंव्हा मन तुझ्या विरहाच्याही प्रेम

ात पडलं
तू टाळायला लागलीस, तेंव्हा मन तुझ्या 'त्या' तिरस्काराच्याही प्रेमात पडलं
तू 'नाही' म्हणालीस, तेंव्हा मन तुझ्या नकाराच्या प्रेमात पडलं
तू असं 'एकट' पाडलंस, तेंव्हां मन माझ्या एकांताच्याही प्रेमात पडलं
...
...
आता, हा एकांतच प्रेमाने सांगतोय ---
"ती आता नाहीच आहे, यापुढेही सोबत नसणार आहे,
विचार कर, सुरुवातीपासून शेवटपर्यंत सर्व आठव
आणि शोध ...
'ती 'सोबत' होती का कधी' ? "

....!
.....!!
.......!!!

"अरे, मग मी कुणाच्या प्रेमात पडलो होतो..?!!!?"
...
"स्वतःच्या!"
...
"काहीही काय !!"
...
"अरे हो, तू तुझ्यावरच प्रेम करू लागला आहेस, तुलाच ओळखायला लागला आहेस...
दुसऱ्याला समजून घेता घेता स्वतःलाच समजून घेवू लागला आहेस..."
...
"मला नाही पटत हा तुझा युक्तिवाद "
...
"ऐक,
प्रेमात पडणं आणि प्रेम करणं यात फरक आहे मित्रा !
तू तिच्या प्रेमात पडला होतास, आणि आता, तू तुझ्यावर प्रेम करतोयस !!
प्रेमात 'पडल्याने' जखमा होतात ...तर प्रेम केल्याने 'शांती' मिळते
प्रेमात पडण्यात 'आसक्ती' आहे ...तर प्रेम करण्यात 'तृप्ती' आहे.
प्रेमात पडण्यात होकाराचे 'सुख' किंवा नकाराचे 'दुःख' आहे,
तर प्रेम करण्यात स्वतःला शोधण्यातला निखळ 'आनंद' आहे..."

"अब्बे, प्रेम करायला समोर कुणीतरी असायला हवं ना...
हे काय खुळचट सारखे स्वतःवरच प्रेम !
पण, मी बदलत आहे हे एक मात्र मान्यच करायला हवं..."

"प्रेमात एकतर्फी वा दुतर्फी असं काहीच नसतं,
असतं ते फक्त एकरूप होणं ...!
'एकरूपता' हीच प्रेमाची एकमेव कसोटी आहे...
ती तुझ्याशी किंवा तू तिच्याशी 'एकरूप' झालाच नाहीत ...
'सहवास' लाभूनही 'समृद्ध' झालाच नाहीत...
सांग , याला 'प्रेम' कसं म्हणायचं?
तुझा एकांतच तुला समृद्ध करत गेलाय...
परिपक्व आणि प्रेमळ करत गेलाय ...
तुझ्यातील बदलाचा हाच तर अर्थ आहे ...
विचार कर,
सुरुवातीपासून शेवटपर्यंत सर्व आठव
आणि शोध ...
तुला कळेल ...
तुझ्यातला 'तूच' अधिक 'सोबत' करत होता तुझी ..!
तू तुलाच प्रेमाच्या वाटेवर घेवून जात होतास..
तुलाच घडवत होतास ...
तू तुझ्याशीच एकरूप होत होतास ...
यालाच मी 'प्रेम करणे' म्हणतो...!"
...
"लय भारी दोस्त..! वाह वाह !!
आता, अजून 'शांत' वाटतंय ...प्रसन्न वाटतंय...!
आयला, पुन्हा प्रेमात पडावंसं वाटतंय "

"खबरदार, पुन्हा प्रेमात पडशील तर, xxxx ?"