पुनर्विवाह

लग्नाआधीची ‘सखू’ लग्नानंतर

नाव बदलून ‘ठकू’ झाली,

लग्नाआधीचा ‘दगडू’ मात्र

लग्नानंतरही ‘दगडू’च राहिला

‘ठकु’चे फक्त नाव होते

संसार ‘सखू’ करत होती

‘दगडू’ अजून दगडच राहिला होता

म्हणून संस्कारी ‘सखू’ मन खात होती   

‘सर्वसुखअभिलाषी’ दगडू

हे तिचे दुःख जाणून होता

पण, ‘आपण बदलणार नाही’

असा त्याचा खमक्या संस्कार होता

ठकू म्हणे सखुला – “दगडच आहे गं तो !

नाव बदलायच्याही लायकीचा नाही.

सांग त्याला, - ‘नाव पुन्हा ‘सखू’ कर,

नाहीतर ही ‘ठकू’सुद्धा ‘सर्वसुखविनाशी’ आहे’’  

ऐकताच ही ‘ठकु’गर्जना,

सुखाभिलाषी ‘दगडू’ टरकला

‘दगडू-ठकू घटस्फोट’ फाईल करून

‘दगडू-सखू पुनर्विवाहा’ची पत्रिका छापून आला.