गुजरी हुई जवानी

प्रत्येक बाईकडे प्रेमाने पाहणारा मी,

आज तिच्या

कडेवरच्या मुलाकडे प्रेमाने पाहत आहे

ते मूलही माझ्या नाटकावर हसून दया दाखवत आहे 

हे असे काय बरे होत आहे ? हे असे का बरे होत आहे ?.... १

प्रत्येकिशी हस्तांदोलन करणारा मी,

आज त्यांना

हात जोडून नमस्कार करत आहे

हातांचे आंदोलन संपवून आदराचे संमेलन भरवत आहे

हे असे काय बरे होत आहे ? हे असे का बरे होत आहे ? .... २

बायकोचीच इमानेइतबारे आठवण काढणारा मी,

आज शाळेतल्या

माझ्या शिरोडकरला आठवत आहे,

राहून गेलेल्या प्रेमाचा मनातच पूनर्गणेशा करत आहे  

हे असे काय बरे होत आहे ? हे असे का बरे होत आहे ?.... ३

तुरळक पांढरे केस शिरी मिरवणारा मी,

आज स्वतःच

ते शोधून शोधून काळे करत आहे

जे लपवायचे तेही संपले, आता शिल्लक केस लपवत आहे  

हे असे काय बरे होत आहे ? हे असे का बरे होत आहे ?.... ४

काही गोष्टी कधीच मनापासून न करणारा मी

आज त्याच

गोष्टी मुलगा मनापासून करत नाही म्हणून त्रागा करत आहे

‘आमच्यावेळी-तुमच्यावेळी’ अशी पिढीजात वाद दरवेळी उकरत आहे, दांभिकतेत उरकत आहे     

हे असे काय बरे होत आहे ? हे असे का बरे होत आहे ?.... ५

      

साध्या मतदानासही कधीच न जाणारा मी

आज चक्क

भारतीय अर्थव्यवस्थेबद्दल हिरिरीने मत मांडत आहे

‘भारताचे काही खरे नाही !’ असा उच्छ्वास रोज उगाच टाकत आहे

हे असे काय बरे होत आहे ? हे असे का बरे होत आहे ?.... ६ 

कधीच बरं वाईट न पाहणारा, मस्तीतला माजोर्डा तू

आज एकदम

‘हे काय बरे होत आहे ? , हे का बरे होत आहे ?’ अशी बोंब का बरे मारत आहे ?

साध्या सोप्या गोष्टींवर लंबीचौडी सहाकडवी कविता करून बोअर का बरे करत आहे ?

अबे, गुजरी हुई जवानी !  एवढं साधं कसं कळत नाही ?

बरंच वय झालंय तुझं !

अरे तू म्हातारा होत आहेस ! अरे तू म्हातारा होत आहेस !! .... ७