हेल्मेटसक्ती

नोंद घ्या नोंद, अखंड जगाने घ्याहो नोंद
पुण्यातल्या जनतेचा हेल्मेटसक्तीला विरोध

विद्येचे हे माहेरघर, येथे सुज्ञांचे आहे घर
सदसदविवेकाला यांच्या लागली आहे घरघर

वाहनांचा वेग कमी, धडकतो कुठे आम्ही ?
धड़कलो जरी कधी, कवटी शाबूत ठेवतो आम्ही !

स्वतःची काळजी नाही, तेथे हे इतरांची काय घेणार ?
राजकारणी जेथे सामिल, तेथे पोलिस काय करणार !

अभ्यास नाही, तर्क नाही, कायम नशिबावर हवाला
मुठेकाठच्या ओंकारेश्वराला यांनी ठेवले आहे कामाला

जेथे डोकेच नाही यांना, तिथे यांचे फुटणार कसे डोके ?
पुणे तेथे 'डोके' उणे, हे यमाचे बोल ठरणार नक्की फुके !

--- यम (यशवंत महाकाळ)
नोव्हेंबर 12, 2014.