प्रवासी

========
प्रवासी
========


आस्तिक म्हणतो ---
"तो आहे , नि मी आहे
तो आहे म्हणून मी आहे
तो नसेल तर मी काहीच नाही
त्याच्यावर माझी श्रद्धा आहे "

नास्तिक म्हणतो ----
"तो नाही, तो मीच आहे,
तो नि मी वेगळा नाहीच
तो नसला म्हणून काय झाले
मी आहे ना !
माझी माझ्यावर श्रद्धा आहे "

आस्तिक नास्तिकाची
ही जुगलबंदी ऐकून
एकजण म्हणाला ----
"अरे, भांडू नका रे असे !
मी सांगतो -
तो ही नाही, तुम्हीही नाही
नी मीही नाही ! कुणीही नाही !! 
जे आहे असे वाटते ते नाहीये
जे नाहीये त्याची केवळ अनुभूती आहे
अनुभूती आहे म्हणजे उगम आहे
हा उगम म्हणजे तो ही नाही,
तुम्हीही नाही नि मी ही नाही,
तो पाचवा असा कुणीतरी आहे की
ज्याच्यापर्यंत पोहोचता येत नाही,
पण त्याच्यापर्यंत पोहोचण्याचा
प्रवास आपण सर्व (तो, तुम्ही नि मी ) करू शकतो --
असा प्रवास - ज्याला गंतव्य स्थान नाही
आपण फक्त प्रवास करायचा,
आपण हा प्रवास जगायचा
पाचव्याचा शोध घेत घेत !
माझी या पाचव्यावरही श्रद्धा नाहीये
पण या प्रवासावर माझी नितांत श्रद्धा आहे !!"

हे ऐकून न सापडलेला पाचवा म्हणतो --
"नशीब, एक तरी 'प्रवासी' सापडला !"

---- यम