या दु:खांनो या

या दु:खांनो या
अपेक्षांच्या बाजारात अपेक्षाभंगांना घेवून या
कोमल माझ्या मनास आता, सक्षम करण्यास या
सुधारणेच्या यात्रेतला हा आनंद मोठा करण्यास या
या दु:खांनो या

या द्विधांनो या
बहुविध मार्गांच्या जंजाळात संभ्रमांना घेवून या
गोंधळलेल्या मनास आता, प्रकाशवाटा देण्यास या
सुधारणेच्या यात्रेतला हा प्रकाश लख्ख करण्यास या
या द्विधांनो या

या दुष्टांनो या
विकारांच्या  गर्दीतला उपद्रव सारा घेवून या
विकारी मनास माझ्या, निर्विकार करण्यास या
सुधारणेच्या यात्रेतली ही धिटाई वाढविण्यास या
या दुष्टांनो या


या दुर्दैवांनो या
अगतिक करणाऱ्या नियतीच्या कुचेष्टांना घेवून या
सत्याच्या प्रवासात माझ्या, धीर शिकवण्यास या
सुधारणेच्या यात्रेतला हा दैववाद मारण्यास या
या दुर्दैवांनो या

या साऱ्यांनो या
गगनचुंबी यशास माझ्या जमिनीची धूळ चारण्यास या
उंच फिरणाऱ्या धुंद मनास, माझ्या खोली दाखवण्यास या 
सुधारणेच्या यात्रेतले हे संतुलन कायम टिकवण्यास या

या दु:खांनो या, द्विधांनो या, दुष्टांनो या, या दुर्दैवांनो या !