तू बुम पाव गं

ऊठ ऊठ इकॉनॉमी आई, तूला नवस करीतो आई
                                                      तू बुम पाव गं II

पूर्वेचे लयी थोर, चपट नाकही होयी शिरजोर
पश्चिमेचे सारे चोर, त्यांचा सहन केलाय मुजोर
कोणामागं जावू, कुठवर जावू, काय बी सुधरना आई
जरा मंधी बी ध्यान दे गं आई, तूला नवस करीतो आई
                                                      तू बुम पाव गं II

बाजार पडतोय, रुपया घसरतोय, रोज नवं आर्थिक झेंगाट
पैसा हाय पन लावयचा नाय, आता रोकडींनी भरलं कपाट
धोरणांचं नाव मोठं, अंमलाचं लक्षाण खोटं, रोजचंचं गं हे आई
डोक्यात थोडी अक्कल घाल गं आई, तूला नवस करीतो आई
                                                      तू बुम पाव गं II

शहरं वाढली मोकाट, मोडलंय त्याचं पेकाट
नाजूक त्येंचा जीव, लगेच पसरतंय भोकाड
भूक लयी छोटी, हाव त्याची मोठी, कसं गं जमायचं आई
समतोल साधाया हवा गं आई, तूला नवस करीतो आई
                                                      तू बुम पाव गं II

कोरडा दुष्काळ ह्यो, आम्हा मारून गेलाय
औंदाचा हाय वल्ला, वरून अंदाज आलाय
गुदमरे जीव, येतीया कीव, आता आक्षिजन दे गं आई
एकशेवीस कोटींची आन हाये आई, तूला नवस करीतो आई
                                                      तू बुम पाव गं II

धोरणांची राखू लाज, अमलाचा ठेवू बाज
भ्रष्टाचार नको नको, कष्टाला देवू मान
पैसा वाचवा, पैसा गुंतवा, तुझ्या हाकेला ओ देवू आई 
देशासंगट जगाचं भलं कर आई, तूला नवस करीतो आई
                                                      तू बुम पाव गं II